Dis da la plurilinguitad 2025
A chaschun dal Di europeic da las linguas dals 26 da settember, ha lieu la 6avla ediziun dals Dis da la plurilinguitad en l’administraziun federala, e quai dals 22 fin ils 26 da settember 2025. La finamira da quests dis è da promover la plurilinguitad ch’è ina da las valurs da basa da nossa coesiun naziunala.
Ristgar da far il pass sur ils cunfins ora
La delegada federala per la plurilinguitad envida tut las collavuraturas e tut ils collavuraturs da l’administraziun federala da far il pass sur ils cunfins linguistics ora ed uschia da scuvrir in flum simbolic: la Sarine. Ella è bler dapli ch’in simpel flum, ella represchenta in cunfin, in foss, il famus «Röstigraben».
Quest flum ch’è en la schientscha svizra er in’allegoria per la separaziun, simbolisescha in liom fluid ed entretschà tranter la fauna, la flora e l’uman. Quai è la visiun da Jean-Théo Aeby, il reschissur friburgais dal film «Ma Sarine», che ha percurrì tut ils 126 kilometers dal flum. Il film è in invit da chattar e da traversar las punts tranter las communitads linguisticas.
Ultra da quai pon las collavuraturas ed ils collavuraturs da l’administraziun federala approfundar quest tema cun videos, en ils quals collegas s’expriman en connex cun la sensibilisaziun per la lingua e per la cultura da la Svizra taliana u rumantscha.
Infurmaziuns pli detagliadas davart il stadi da la plurilinguitad en l’administraziun federala èn disponiblas sut: Evaluation, Monitoring & Koordination.