Dis da la plurilinguitad 2026 – «Collaborez-vous Suisse?»
A chaschun da la 7avla ediziun dals Dis da la plurilinguitad da l’administraziun federala che ha lieu dals 21 fin ils 26 da settember, As envida la delegada federala per la plurilinguitad a reflectar davart la coesiun dal team en in context pluriling. Questa emna stat en connex cun il Di europeic da las linguas dals 26 da settember. La finamira è quella da promover la plurilinguitad ch’è ina da las valurs da basa da nossa coesiun naziunala.
«Collaborez-vous Suisse?»
L’administraziun federala duai garantir ina represchentanza equilibrada da nossas cuminanzas linguisticas e promover in diever armonic da nossas linguas uffizialas. Ma co statti cun las dinamicas internas da communicaziun da las squadras che furman l’administraziun federala? Co duain ins «collavurar Svizra», quai vul dir en pliras linguas uffizialas? La delegada federala per la plurilinguitad As envida a reflectar davart questa tematica cun guardar il film da la SSR «Chantez-vous Suisse?» e cun in exempel d’ina squadra plurilingua da l’Uffizi federal da svilup dal territori ARE.
L’experientscha «Chantez-vous Suisse?»
Quest film raquinta l’experientscha da 5 artistas ed artists che represchentan las 4 regiuns linguisticas e la Svizra immigrada e che ston cumponer ensemen entaifer in’emna ina nova musica senza duvrar ina lingua dominanta. Quest è il trailer:
Nus As envidain a guardar il film (durada 52 min) sin Play Suisse (adatg: Vus stuais crear in conto via il login SSR u utilisar Voss conto, sche Vus essas gia registrada u registrà): https://www.playsuisse.ch/detail/3375920
Tge effect ha questa experientscha anc dus onns pli tard per las artistas ed ils artists? Per scuvrir quai As annunziai qua per ina saira da concert e da discussiun en preschientscha da las artistas e dals artists e da la realisatura dal project «Chantez-vous Suisse?». Il program da la saira che la delegada federala per la plurilinguitad ha organisà en il rom da l’Emna da la lingua franzosa e da la Francofonia, cumbina muments musicals e da discussiun cun las artistas ed ils artists e prevesa da tadlar anc ina giada las differentas chanzuns dal project. La saira ha lieu la mesemna, ils 31 da mars 2027 a las 17.30 en Bierhübeli.
Ina squadra plurilingua da l’administraziun federala
Scuvri er, co che questa squadra da l’Uffizi federal da svilup dal territori ARE viva concretamain la plurilinguitad e pertge ch’ella As envida a la promover:
Per cumplettar il program, As envidain nus a (re)scuvrir las purschidas da sensibilisaziun per il rumantsch ed il talian.
As annunziai via doodle per la sensibilisaziun per la lingua e la cultura rumantscha.
Las responsablas ed ils responsabels per la plurilinguitad da las singulas unitads administrativas u dals singuls departaments pon proponer ulteriuras ideas per francar anc dapli quest tema en Vossa organisaziun.
Dapli infurmaziuns davart la politica da plurilinguitad en l’administraziun federala, chattais Vus sin la pagina «Förderung der Mehrsprachigkeit».