Dis da la plurilinguitad 2025 – Ristgar da far il pass sur ils cunfins ora
A chaschun dal Di europeic da las linguas dals 26 da settember ha lieu la 6avla ediziun dals Dis da la plurilinguitad en l’administraziun federala, e quai dals 22 fin ils 26 da settember 2025. La finamira da quests dis è da promover la plurilinguitad ch’è ina da las valurs da basa da nossa coesiun naziunala.
La Sarine: in viadi tranter duas communitads linguisticas
La delegada federala per la plurilinguitad As envida da far il pass sur ils cunfins linguistics ora ed uschia da scuvrir in flum simbolic: la Sarine. Ella è bler dapli ch’in simpel flum, ella represchenta in cunfin, in foss, il famus «Röstigraben».
Quest flum ch’è en la schientscha svizra er in’allegoria per la separaziun, simbolisescha in liom fluid ed entretschà tranter la fauna, la flora e l’uman. Quai è la visiun da Jean-Théo Aeby, il reschissur friburgais dal film «Ma Sarine», che ha percurrì tut ils 126 kilometers dal flum. Il film è in invit da chattar e da traversar las punts tranter las communitads linguisticas.
Avais Vus mustgas da scuvrir dapli suenter questa sequenza? Lura As annunziai per ir a guardar l’entir film «Ma Sarine», en preschientscha dal reschissur. La saira da kino che la delegada federala per la plurilinguitad organisescha en il rom da l’Emna da la lingua franzosa e da la Francofonia, ha lieu ils 17 da mars 2026 a las 17.00 al cineClub, Laupenstrasse 17, a Berna.
Sensibilisaziun: in viadi che traversa pliras linguas e culturas
Trais collavuraturas e collavuraturs expriman en lur videos lur experientschas en connex cun la sensibilisaziun per la lingua e per la cultura da la Svizra taliana e rumantscha.
Per cumplettar il program As preschentan las auturas ed ils auturs il cuntegn da questa sensibilisaziun.
Per l’onn 2025 hai anc plazzas libras per la sensibilisaziun per la lingua e per la cultura rumantscha. As annunziai qua.
Las responsablas ed ils responsabels per la plurilinguitad da las singulas unitads administrativas e dals singuls departaments pon proponer iniziativas supplementaras, sa referind a la Norma da referenza per la promoziun da la plurilinguitad en l’administraziun federala» che As dat ina curta survista da las mesiras da realisaziun pussaivlas.