Nicoletta Mariolini, Delegada federala per la plurilinguitad

Nicoletta Mariolini

En Svizra èn liads tut ils champs professiunals, directamain u indirectamain, sco tras ina corda a l'istorgia da la plurilinguitad. Pli damanaivel ch'il champ professiunal è a l'administraziun publica e pli stretg che quest liom daventa.

L'administraziun federala è sa furmada e sviluppada parallelamain a la furmaziun da la Svizra. En quest senn sto ella cuntinuar a nutrir las ragischs da la coesiun naziunala cun investir en il chapital linguistic da sias collavuraturas e da ses collavuraturs e cun valurisar quel en tut las realitads territorialas.

Quai vul dir che l'administraziun federala s'adatta a las minoritads linguisticas e betg viceversa. Il temp ans ha però mussà che quest process n'è insumma betg spontan. Perquai èsi indispensabel da promover, sustegnair e rinforzar las minoritads linguisticas cun agid da mesiras d'accumpagnament fixadas en la legislaziun a lunga vista.

La lescha da linguas e l'ordinaziun respectiva èn il fundament da questas mesiras d'accumpagnament. Ellas permettan da surpassar las difficultads e da dar schlantsch a la plurilinguitad tant a l'intern sco a l'extern da l'administraziun federala.

La delegada controlla en il champ da la politica da promoziun da la plurilinguitad che la lescha vegnia applitgada e sustegna il Cussegl federal, i departaments e las unitads administrativas cun accumplir lur incumbensas. La vischinanza da las regiuns, schizunt las pli perifericas, gioga ina rolla essenziala. Perquai collavurescha la delegada tant cun las autoritads chantunalas sco cun ils gremis naziunals che s'occupan da la promoziun da la plurilinguitad.

Basas giuridicas

Contact

Nicoletta Mariolini
Bundesgasse 3
3003 Berna
+41 58 462 64 35
plurilingua@gs-efd.admin.ch 

https://www.plurilingua.admin.ch/content/plurilingua/rm/home.html